Luke 3

3:1-20 John Bafataito Ari Kato, Tuturo Edo Vironu Sedo Ghusira.

(Matthew 3:1-12; Mark 1:1-8; John 1:19-28)

1Genembo javo Tiberius, nu Rome embo a evetu genembo isambu da kotofu teria edo iriri, ghaeko 15 ava dadabusira. Ainda sifo aminda, genembo javo Pontius Pilate, nu Judia frovensi ainda kotofu edo irei. Kini (King) Herod nu Frovensi Galilee kaifa edo ghusira, a Herod da namendi Philip, Ituria ã Trakonaitas frovensi ava, nune kaifa edo ghusira. Genembo javo Lysanias, nu Abelin frovensi ainda kotofu edo irei. 2Reighi Jerusalem aminda, fristi+ da giti jighari etoto naká, javo Annas nengae Caiaphas ghae, fristi+ nene kaifa edo ghuseri. Sifo aminda, Zechariah da mandi John, reighi uvu a evetu genembo irae da vasa aminda ira iriri, God nunda geka ava, John osa sare dae sedo futusira. 3Mutiri gido, John eredo uvu Jordan ainda dengesida ise fuse, vironu eminge sedo ghusira, “Fuvu eminda, nenda ari ekoko vujegururovo, bafataito aono, God nenda ari ekoko kote doyare!” vironu aminge sedo ghusira. 4God da feroveta Isaiah anakora beká, John nunda saramana rea arira ava, nunda bukuda eminge gefusira:

“Mave reighi uvu a evetu genembo irae da vasa aminda fetirise, koko fuge vironu resira,
‘Bajari da emboro rerebevu dambu are!
5Enda doriri ghambuvu, vose tevisa are! Urokuto amo furevu, viti dambu are!
Emboro birurughari amo rerebevu, ya dambu are! Enda vitari vosari ábarago, jevu vose vivisegare!
6Amingururovo, God da sonemba ava isagha ari, evetu genembo isambu garera!’”
aminge gefusira.

7Evetu genembo digari, nemoá bafataito are dae sedo, John kena foa ghedo ghuseri. Furureoro, nemokena eminge sedo ghusira, “Ne Satan da sasinguri. ▼

▼3:7Afige, geka Matthew 3:7 ainda duruda tege garesa.

Ne na jo derae areva. Ne dubo jo jovereghae ireva. God nenda ari ekoko aindae, janje eko use mino mutari erekotira ava, ne jo reda darige yae areva. 8Ágido, dubo jovereghedo, veka eveva use irivu! Erá eminge seove! ‘Abraham namanenda abua gido, God namane uju eraira!’ aminge erá seove! God nu uju aetira amo, nu sari ghamana iritirira eimi, Abraham da sasingu jinaeteri. God evetu genembo da oro aindae, jo kotae eraira. Mavejo Israel embo o oro eni amo, God jo kotae eraira. 9God nu, ika karivakoi susuda jari dae sedo, simbugedo refira. (Ika resena emo, nemori.) Ika vuji eveva jigharira amo, irarira. O jo eveva jighae arira amo, God ika amo jedo avarakada dungari avarira,” aminge sedo ghusira.

10Seari, evetu genembo ategi edo ghuseri, “Namane nange nange areri?” 11Seoro, John nu mino eminge sedo ghusira, “Nenda tamo asugari etoto irarira amo, eni kosughe mutuvu, makasi emboi baore! Nenda bayau irarira ábarago, budo soro evu!” aminge sedo ghusira.

12Sifo eni, takesi bari kakato mendeni fera buvudo, nemo bafataito are dae sise, eminge siseri, “Ijuga Kato, se ningore! Namane rejoá areri?” aminge setero, 13John sisira, “Takesi da mino beká avanembo buvu! Erá kokomana dederuse mino teria beove!”

14Aminge setiri, isoro kakato mendeni, nembarago ategi useri, “Se ningore! Namane mo, nange areri?” setero, John nemokena sisira, “Erá nenda fakinaimi evetu genembo katiyavara use, nenda moni saghimbe beove! Erá koto use, mino bari dae sedo, gungubo seove! Geka bekáda sevu! Erá nenda saramana eraeva, ainda minondae sedo beisiga eove!” aminge sisira.

15John geka ava siri ningido, evetu genembo kotisera amo, “Genembo eni God mutari sisira amo, avose, numori tanojo!” 16Aminge kotero, John itatamedo sisira, “Namo, ne tefo uvuimi bafataito eraena. Avata nanda amboda, Genembo eni refira. Numo, genembo teria bekári. Na jo numongo iraeri. Na taká sabua bekári. Numo ne Asisi Kakara nengae avarakaghae aimi bafataito arira. 17Genembo amo, nu vare numamo da kaugori. Nune farava veka budo gategari dae sedo, simbuge refira. Gategedo, farava da beká ava simbuge budo, nunda kamboda fitari irarira. O anoso ifughae amo budo, avaraka sukainghae tambuno aminda fugari vosedo, evovodae aminda irarira,” John aminge sisira.

18Geka evia ã kotugo, geka mendeni mendeni sise, John nu God da Bino Eveva ava, evetu genembokena vironu sedo ghusira. 19Aminge sise, nu frovensi da kotofu Herod dae ghoghora sedo ghusira. Ainda susu mo: nunda koro jo ambae iriri, noaro javo Herodias ava saghimbe bu fifitusira. Ã kotugo, ari ekoko mendeni ava edo ghusira. 20Ari ekoko mendeni edo ghusira ainda etoda usira amo, nu setiri, John bu diburada fifituseri.

3:21-22 John Iesu Ava Bafataito Usira.

(Matthew 3:13-17; Mark 1:9-11)

21John jo dibura ae irise, evetu genembo numokena foa ghusera amo, isambu bafataito edo ghusira. Ainda amboda Iesu fira buviri, John numbarago bafataito usira. Amingetiri, Iesu nu banungiri utu afigetiri, 22Asisi Kakara kau ribo ava jine vose fira, Iesu kena asugusira. Vose asugetiri, beka utuda ghe eminge sisira, “Nimo nanda dubo bari Mandiri. Na nindae ivuga use, aiyakoe beká resena!”

3:23-38 Iesu Da Nombuamaneri.

(Matthew 1:1-17)

23Iesu da ghaeko 30 avaga dadabiri, nu tuturo edo God Afa da saramana ava, isaghada edo ghusira. Evetu genembo kotedo ghusera amo: Iesu nu Joseph da mandiri.

Joseph da numamo mo Heli ri. 24Heli da numamo mo Matthat ri.
Matthat da numamo mo Levi ri. Levi da numamo mo Melchi ri.
Melchi da numamo mo Jannai ri. Jannai da numamo mo Joseph ri.
25Joseph da numamo mo Mattathias ri. Mattathias da numamo mo Amos ri.
Amos da numamo mo Nahum ri. Nahum da numamo mo Esli ri.
Esli da numamo mo Naggai ri. 26Naggai da numamo mo Maath ri.
Maath da numamo mo Mattathias ri. Mattathias da numamo mo Semein ri.
Semein da numamo mo Josech ri. Josech da numamo mo Joda ri.
27Joda da numamo mo Joanan ri. Joanan da numamo mo Rhesa ri.
Rhesa da numamo mo Zerubbabel ri. Zerubbabel da numamo mo Shealtiel ri.
Shealtiel da numamo mo Neri ri. 28Neri da numamo mo Melchi ri.
Melchi da numamo mo Addi ri. Addi da numamo mo Cosam ri.
Cosam da numamo mo Elmadam ri. Elmadam da numamo mo Er ri.
29Er da numamo mo Joshua ri. Joshua da numamo mo Eliezer ri.
Eliezer da numamo mo Jorim ri. Jorim da numamo mo Matthat ri.
Matthat da numamo mo Levi ri. 30Levi da numamo mo Simeon ri.
Simeon da numamo mo Judah ri. Judah da numamo mo Joseph ri.
Joseph da numamo mo Jonam ri. Jonam da numamo mo Eliakim ri.
Eliakim da numamo mo, 31Melea ri. Melea da numamo mo Menna ri.
Menna da numamo mo Mattatha ri. Mattatha da numamo mo Nathan ri.
Nathan da numamo mo David ri. 32David da numamo mo Jesse ri.
Jesse da numamo mo Obed ri. Obed da numamo mo Boaz ri.
Boaz da numamo mo Salmon ri. Salmon da numamo mo Nahshon ri. 33Nahshon da numamo mo Amminadab ri. Amminadab da numamo mo Admin ri.
Admin da numamo mo Arni ri. Arni da numamo mo Hezron ri.
Hezron da numamo mo Perez ri. Perez da numamo mo Judah ri.
Judah da numamo mo, 34Jacob ri. Jacob da numamo mo Isaac ri.
Isaac da numamo mo Abraham ri. Abraham da numamo mo Terah ri.
Terah da numamo mo Nahor ri. Nahor da numamo mo, 35Serug ri.
Serug da numamo mo Reu ri. Reu da numamo mo Peleg ri.
Peleg da numamo mo Eber ri. Eber da numamo mo Shelah ri. 36Shelah da numamo mo Cainan ri. Cainan da numamo mo Arphaxad ri.
Arphaxad da numamo mo Shem ri. Shem da numamo mo Noah ri.
Noah da numamo mo Lamech ri. 37Lamech da numamo mo Methuselah ri.
Methuselah da numamo mo Enoch ri. Enoch da numamo mo Jared ri.
Jared da numamo mo Mahalaleel ri. Mahalaleel da numamo mo Cainan ri. 38Cainan da numamo mo Enos ri. Enos da numamo mo Seth ri.
Seth da numamo mo Adam ri. Ã Adam da numamo mo God ri.